Ilinniartut ilinniarnerminni iluatitsinerat uangutsinnut pitsaassutsimik naqissusiisarpoq

Maani ilinniartuuterput Helga Jakobsen, Sonja Christensen ilagalugu 22. April 2021 KNR-ip unnukkut aallakaatittagaanni Illeq-mi peqataasimapput, tassani oqaluttuarineqarluni Niuernermik Ilinniarfimmi innarluuteqarluni ilinniartuulluni qanoq innersoq.

Apersorneqarnerup siunertarisimavaa, erseqqissarniarlugu, suut ajornartorsiutaasinnaasut allanut ilinniartunut innarluuteqangitsunut naleqqiullugit atugaanersinnaanersut – aammalu Helga tunuliaqutaalluni qanoq iliortoqarsinnaanersoq. Taamatut innarluuteqarluni ajornartorsiutaasinnaasut annersarisimavaat suliffimmik sungiusarfissaaleqineq. Ajoraluartumillu aamma tamanna Helga-mut ajornartorsiutaasimavoq.

Helga atuarluni allartissimavoq ukioq 2016-miik 2018-mut ilinniakkamut TNI Flex-imut, aammalu ingerlaqqilluni TNI Basis-imut, tassani siunertaralugu ilinniaqqinnissani. Pisiniarfimmi sulisunngorniaraanni ilinniagaq paarlakaajaattoq aqqusaartariaqarpoq, tassani suliffimmik sungiusarneq aammalu atuagarsoriartarneq paarlakaallugit ingerlanneqartarluni. Ilinniagarlu taanna toqqarsimangaanni piumasaqaataavoq, suliffimmik sungiusarfissamik nassaarsimanissaq.

Qinnuteqarnerit arlallit aqqusaareerlugit Helga kiisami suliffimmik sungiusarfissaminik nassaarsimavoq. Tassami Elgiganten-ip sulisuinut ilangukkami ulloq 2. December 2019.

“Helgap pikkoriffigaa oqaraangami oqartarami – piffissamik eqquiuaannarpoq, innarluuteqaraluarluni napparsimajuitsuulluni – taamaattumik suleqatitsialaavoq, sapinngisanilu tamaat peqataalluni. Innarluutini utoqqatsissutitut atunngisaannarpaa – oqaluttuarporli, piffissamik atuinerulaaginnartarluni, kisiannili tamaviaarluni nutaanik ilikkagaqarusuttarluni” – Sonja Christensen

Helga-p oqaluttuassartaata ilinniartippaatigut, tamaviaartariaqartutit anguniakkat angussangukku, immaqalu Helga-tuut suliffinniik ilinniarfimmiillu akuerineqarsinnaaneq anguneqarsinnaalluni.

Niuernermik Ilinniarfimmi qilanaarutigaarput Helga 2022-mi ilinniakkaminik naammassinninnissaa aammalu ilinniartuutitta ilagimmassuk nuannaarutigalugu – sorsuuteqarneq kusanartoq.

Ugguuna allakaatitaq takoqqissinnaavat:

Leave a Comment

Your email address will not be published. Required fields are marked *

Scroll to Top