Peqatigiilluta ingerlalluarneq pilersissavarput?

Kalaallit Nunaanni Niuernermik Ilinniarfik ikiut 40-t sinnerlugit inuussutissarsiornermi sulisunik toqqammaviliisuusimavoq. Inuussutissarsiornerup iluani siammasissunik ilinniakkanik aamma suliffinnik misiliiffiusunik ilinniarfissanik neqerooruteqarpugut.

”Atuarfimmi atuagarsornerup sulinerullu ataqatigiissumik ingerlanneqarnera assorsuaq nuannarivara. Ilinniagaq eqimattani sulisinnaanissamaik piumasaqaateqanngaatsiarpoq, matumani imminut akisussaaffigeqatigiinneq kiisalu kikkut tamat peqataanissaannik qulakkeerinneqataanissaq ilinniarneqarluni. Ilinniartoqatit peqatigalugu ataqatigiinneq pitsaanerusinnaanngilaq, inuunerullu sinneranut ikinngutitaarfiulluni.” – Charlotte Ludvigsen, Borgmesteri Kommuneqarfik Sermersooq

”Inuiaqatigiinnut piffissap ingerlanerani imminnut napatikkusuttunut inuusuttut arlallit niuernerup aningaasaqarnerullu iluani ilinniarluarsimanissaat pingaaruteqarluinnarpoq, taamak oqarpoq  Lars-Emil Johansen ukiut 40-t matuma siorna Niuernermik Ilinniarfimmut aallartitseqataasimallunilu tunngavisseeqataasimasoq. ” Uani atuarfiup pisortarisimasaa 1980-kkunni Ole Ramlau-Hansen takuneqarsinnaavoq. (Assilineqarsimasoq Leif)

Nuummi Niuernermik Ilinniarfik aallartitsinnagu Kalaallit Nunaanni niuernikkut ilinniarsinnaaneq periarfissaasimanngilaq. Taarsiullugu ilinniassagaanni Ikastimut aallarluni ilinniariarnissaq avaqqunneqarsinnaasimanngilaq.

Niuernermik Ilinniarfik 1979-miilli allanngoriartornermik ineriartornermi ingerlataqarsimavoq, matumani inuiaqatigiinnit ilinniagaqarnissamut pitsaanerusumik ujartuineq aallaavigalugu nunaqavissut ilinniarsinnaassuseqalernissaannik politikkikkut aalajangiussat qanimut suleqatigalugit aallaavigalugillu ilinniarnermi aaqqissuussinerit ingerlanneqartarlutik. Oqaluttuarisaanermi tigulaariffigisinnaasaq imatut isikkoqarpoq. Sukumiinerusumik oqaluttuarisaanermi pisimasut ukiuni 40-nngortorsiornissatsinnut atuakkamik saqqummertussamik suliaqarsimavugut taannalu uani atuarsinnaavat.

Niuernermik Ilinniarfimmi ilinniakkatta ataavartumik nutarsarnissaat eqqummaariffigineqartarpoq, taassumallu saniatigut assigiinngissutit iluani piorsarsimassutsikkullu paasinnilluarsimanermi aallaaveqartumik pitsaasunik sulisoqarnissaq aamma pingaartinneqarluinnarlu. Niuernermik Ilinniarfiup ilisimaarilluinnarpaa anguniakkanik iluatsitsisimanermut ilinniartut ilinniartilluarsimanissaat kiisalu aamma sunniuteqarluarsimanerup ingerlatiinnarnissaa ersiutaasut.

Inuusuttatta ilinniarluarsimanissaat qulakkeerniassavarput, taamaasillutik siunissami Kalaallit Nunaata Namminiilivinnissaanut nunallu imminut aningaasaqarnikkut napatissinnaanissaanut tunngavisseeqataalluassammata” – Múte B. Egede, Naalakkersuisut Siulittaasuat

Scroll to Top