Aamma ukioq manna nangitsilluni ilinniakkanut ilinnialerusullutik arlallit qinnuteqarsimapput.

Inuusuttut 328-t aasannginnerani Niuernermik Ilinniarfimmiit ilinnialernissamut tiguneqarlutik imaluunniit piumasaqaatitalimmik tiguneqarlutik allagarsitinneqarsimapput.

Inuussuttunut ilinniakkat alutorineqarluartut

Inuusuttunut ilinniakkanut qinnuteqartuni amerlasuut tiguneqarsimapput. Ukioq manna 205-it tiguneqarsimapput, 93-illu piumasaqaatitalimmik tiguneqarsimallutik, taakku aatsaat praktik-erfissamik pissarsisimagunik ilinniakkamik aallartissinnaallutik. ”Unammillernatoq uaniippoq, qinnuteqartut praktik-erfiusinnaasuniit amerlanerummata, taamaattumillu arlallit ilinniakkamut pilerigisamut aallartissinnaaneq ajorput, illoqarfimmi nunaqarfimmiluunniit praktik-erfigerusutami praktik-erfissarsisinnaannginneq peqqutaalluni” Christel Lund Bøjler oqarpoq.

Massakkumut 12-it praktik-erfissarsisimapput, oktober-imilu aallartissinnaallutik.

TNI Allaffissorneq aamma Niuertitsisoq oktober-imi aallartittussaapput, taamaattumik suli praktik-erfissarsiorluni qinnuteqarnissamut pissarsinissamullu periarfissaqarpoq” ilinniartitaanermut nakkutilliisoq Kista Isaksen oqarpoq.

Suliffik peqatigalugu ilinniakkamut ukiuni marlunni ingerlasussamut piareeqqaneq

Ukioq manna inuusuttut 123 nangitsilluni ilinniakkanut qinnuteqarlutillu tiguneqarsimapput. Taakkunani 76-it piumasaqaatitalimmik tiguneqarsimallutik, ilinniarnertik aallartissagunikku praktik-erfissarsisimanissaq piumasaqaataammat.”Pitsaasorujussuuvoq taama amerlatigisut nangitsilluni ilinnialerusummata, taavalu pissutsinut piviusunut naleqquttunik suliffittaarsinnaanissamut periarfissaqartitsilluartunut  ilinniagaqalerusullutik qinnuteqarsimammata” Atuarfiup pisortaa Christel Lund Bøjler oqarpoq.

Immikkut piumasaqaatigalimmik tiguneqarsimasuni 76-iusuni 42-t praktik-erfissarsisimapput, ilinniarnissartillu august-imi aallartissinnaallugu.

Nuummi kollegiassaqarnianermi unammillernartut

Inuusuttunut tiguneqarsimasunut ilinniarnerminnillu aallartinniartunut unammillernartoq annerpaaq tassaavoq, Nuummi kollegiaqarnikkut pissutsit. Nuummi kollegiat ilungersunartumik inissisimapput, tamannalu isumaqarpoq ilinnialernissamut tiguneqarsimasut arlallit ilinniakkaminnik aallatissinnaaneq ajulertarmata kollegiassarsisinnaannginneq peqqutaalluni. ”Naalakkersuisut illoqarfimmi kollegialiortitsillutik aallartisarnikuupput, kisianni suli ukiut tulleriiaat ingerlanerini aatsaat pisariaqartitsineq matussuserneqarsinnaalersimassalluni, tamannalu inuusuttut ilinniakkaminnik aallartitsinissaannut sunniuteqarluni” Atuarfiup pisortaa Christel Lund Bøjler oqarpoq.

Suli inissaqartoq

Ilinniakkat ataasiakkat suli inissaqartitsiput. Aningaasaqarneq aamma Pigisanik nalilinni aqutsinermi Bacherlor-itut ilinniagaq aammalu Nunani tamalaani niuerneq aamma niuernermi tuniniaanermi Bachelor-itut-ilinniagaq suli qinnuteqarfigineqarsinnaapput. ”31. august tikillugu tigooraavugut” Christel Lund Bøjler oqarpoq.

Leave a Comment

Your email address will not be published. Required fields are marked *

Scroll to Top